Ftesë për pjesëmarrje: Hackathon Albania 2015 “Jeta në një Qytet tjetër”

/in , , /by

Hackathon Hacker + Marathon është një maratonë e hapur e cila do të organizohet nga AIS në datën 19 Dhjetor 2015. Individë të ndryshëm mund të marrin pjesë, punojnë dhe finalizojnë një aplikacion. Këtë vit tema është Jeta në një Qytet Tjetër dhe sugjerohet të krijohen harta apo app me të dhëna mbi një zonë të caktuar të vendit apo disa qytete krahasuar me njëri tjetrin.

Pjesë e këtij eventi mund të bëhën: Qytetar të thjeshtë; Analist; Inxhinier; Rrëfyes i Mirë (storyteller); Scout Programues, Studentë ose Designer.

Si të përgatiteni?

Secili mund të mendojë për qytetin e tij dhe të mbledhë të dhëna (jo thjesht vetëm numerike), të krijojë një hartë apo aplikacion duke i krahasuar ato me qytetin apo zonën me një zonë tjetër.

  • Të prezantojë me një aplikacion jetën në qytetin e tij dhe nëpërmjet disa prezantimeve të krijohet qartësi mbi jetën dhe problematikat në një Qytet Tjetër.
  • Të dhënat ku mund të fokusohesh duhet të jen mbi mënyrën e të jetuarit si: shërbimet, shëndetsia apo arsimi.
  • Infrastruktura duke përfshirë sa metra rruge të shtruara, distanca urbane, godina, hapësira të gjelbra pyje etj.
  • Ekonomia, punësimi, ndërmarrjet dhe sektorët ekonomik.
  • Demografia, ku lindin apo vdesin më shumë njerëz.
  • Zhvillimi teknologjik dhe aksesimi i shërbimit internet ne qytete të ndryshme etj.

Gjeni temën dhe ndërtoni nje aplikacion mbi qytetin ku jetoni, keni jetuar apo e keni për zemër!

Për më shumë detaje mbi aktivitetin dhe se si të bëhëni pjesë e tij gjeni në linkun si vijon: Hackathon Albania 2015 ose dhe në faqen facebook  të Albanian Institute of Science.

Ju faleminderit!

AIS kundër Projekt Ligjit për kriminalizim të Shpifjes

/in /by

Edhe organizata AIS, promotor i Open Data Albania / Të dhëna Transparente për Shqipërinë i bashkohet thirrjes së BIRN Albania për të mos miratuar Projekt Ligjin që kriminalizon shpifjen. Ky projektligj parashikon dënim me burg, dhe i jep drite jeshile arrestimit të gazetarit. Për ta çuar një gazetar në pranga, tani do të mjaftoj pretendimi i qeveritarit se kritikat dhe analizat për punë negative apo korruptive  janë shpifje. Deri sa të vërtetojë Gjykata (jonë problematike), sa gazetar do ta kenë provuar edhe pa të drejtë qelinë?

AIS i bashkohet thirrjes se BIRN Albania http://www.reporter.al/kriminalizimi-i-shpifjes-ndaj-zyrtareve-te-larte-kercenim-per-demokracine/

I bëhet thirrje Qeverise të tërheqë projektligjin qe kriminalizon “shpifjen ndaj funksionareve te larte shtetërore ose te zgjedhur” http://www.parlament.al/web/pub/pligj_shtese_7895_kodi_penal_24268_1.pdf

AIS inkurajon Kuvendin e Shqipërisë të mos e votojë projektligjin, dhe i bën thirrje çdo aktori civil ti bashkohet këtij qëndrimi.

AIS kundër tre partive kryesore në Gjykatë: Transparenca mbi Donatorët Elektoral

/in , /by

Në datën 5 Tetor 2015 në Gjykatën Administrative Tiranë, do të mbahet seanca paraprake e Proçesit Gjyqësor ku organizata jonë AIS ka paditur tre partitë politike subjekte kryesore në zgjedhje Partinë Socialiste (PS), Partinë Demokratike (PD) dhe Lëvizjen Socialiste për Integrim (LSI). Çështje e parashtruar për shqyrtim gjyqësor është: A janë partitë politike Subjekte të së Drejtës për Informim mbi Financimet Elektorale? Gjithashtu, përmes interpretimit gjyqësor kërkohet të zgjidhet pyetja nëse legjislacioni i jep të drejtë publikut të dijë në kohë reale kush i financon fushatat e partive kryesore.

Kërkesa drejtuar Partive Politike: http://ais.al/new/en/political-parties-and-access-to-information-on-electoral-financing-ais-complaint/

pdf-icon

Akt Padia si vijon

Fletë thirrja e Gjykatës

AIS pjesëmarrëse në Konferencën Vjetore të Telecentre Europe

/in , /by

Instituti Shqiptar i Shkencave AIS, si anëtare e rrjetit Telecentre Europe mori pjesë në konferencën vjetore mbajtur në Beograd data 24- 25 shtator. Konferenca këtë vit kishte në fokus çështje të punësimit në sektori ICT në tregun europian dhe rritjen e kapaciteteve të target grupeve të ndryshme. Gjithashtu në konferencë u prezantuar i-LINC një program që ofron trajnime online për rritje kapacitetesh në tregun europian të punës. Platforma ju shërben të rinjve sidomos nga vende të Europës Lindore. Dita e dytë e eventit u fokusua më tej tek e-Participation dhe zbatimi i programit e-UROPA ku Shqipëria është përfituese.

12034243_1199488273400653_4434350984725646069_o 12064472_10208175704096200_1729303327_n

Thirrje për gazetarë në kuadër të Iniciativës Open Spending

/in /by

Në vijim të programit Money, Government and Politics, AIS po lançon thirrjen drejtuar përfaqësuesve për tu bërë pjesë e një rrjeti të angazhuar për transparencë në shpenzimet publike. Open Spending Iniciative konsiston në krijimin e një forumi kryesisht me gazetar lokal të afirmuar, të cilët janë angazhuar në informimin e publikut mbi mënyrën e shpenzimit të parave të taksapaguesve shqiptar nga institucione buxhetore. AIS do të angazhohet në organizimin e një workshopi dhe një eventi DataThon (Data Maratonë) me pjesëmarrjen e anëtarëve të këtij Rrjeti.

Qëllimi i workshop-it do të jetë aftësimi në:

  • gjetjen e burimeve të informacionit mbi shpenzimet buxhetore të bashkive,
  • efiçencën e këtyre shpenzimeve për shërbime apo punë publike,
  • kontrolli i konfliktit të interesit apo rasteve të abuzimit.

Ndërsa DataThon 2015 do të krijojë mundësinë që anëtarë të rrjetit të prezantojnë gjetjet e tyre mbi mënyrën e qeverisjes duke u bazuar në mbledhje dhe vizualizimin e të dhënave për bashki përkatëse.

Një numër ICT tools për transparencë në shpenzime publike do të synohen të vihen në dispozicion të qytetarëve për ti angazhuar ata në procesin e monitorimit dhe pjesëmarrjes në buxhetim.

Workshopi i parë në kuadër të kësaj iniciative do të organizohet në javën e parë të Tetorit 2015. Organizatorët do të mbulojnë shpenzimet e udhëtimit dhe trajtimin ditor për pjesëmarrës nga rrethet. Ky rrjet synon të nxisë Open Data Journalism në Shqipëri.

Gazetarët janë të ftuar të shprehin interes për tu bërë pjesë e këtij rrjeti sipas këtij formulari:

registerPër informacione apo propozime të mëtejshme mund të shkruani në: [email protected]

Partitë Politike dhe Aksesi i Informimit për Financime Elektorale. Ankimim nga Organizata AIS

/in /by

Në kudër të programit Money, Transparency and Government, Organizata jonë, Instituti Shqiptar i Shkencave është angazhuar për të publikuar dhe vizualizuar të dhëna të Financimit Elektoral, Transaksione të Buxhetit të Shtetit tek Partitë Politike, sikurse Lista të Donatorëve Partiak për fushatat. Në vijim të kësaj pune në fillim të fushatës zgjedhore 2015, organizata ju drejtua me një kërkesë zyrtare tre subjekteve ndër më kryesore në fushatë si Partia Socialiste, Partia Demokratike dhe Partia Lëvizja Socialiste për Integrim. Kërkesa synonte aksesin dhe informimin publik në kohë reale, mbi donatorët, shumat dhe shpenzimet. Objekti i saj konkret është:

  1. Lista e dhuruesve të fondeve jo-publike të përfituara në datat 21 maj deri 21 qershor 2015 dhe që janë mbi shumën 100 000 (njëqindmijë) lekë ose shërbime dhe sende të barasvlershme me të;
  2. Lista e çdo shpenzimi të kryer eventualisht prej datës 21 maj 2015 me fonde vjetore të përfituara nga Buxheti i Shtetit 2015.

 Kjo kërkesë megjithëse e dërguar dhe marrë në dorëzim nga subjektet përmes postës zyrtare nuk mori përgjigje sipas interesit. Duke i konsideruar Partitë Politike si subjekte të rëndësishme për publikun, dhe transparencën me financat e tyre të një rëndësie të veçantë, i jemi drejtuar edhe Komisionerit për të Drejtën e Informimit dhe Mbrojtjen e të Dhënave Personale me një Ankesë kundrejt subjekteve.

Bashkëlidhur me attach po ju përcjellim kopje të kërkesave zyrtare sikurse Ankesës, drejtuar institucionit.

Kërkesa jonë bazohet në nenin 9, paragrafi i tretë i Kushtetutës, neni 87/1, neni 89 dhe 90 i Kodit Zgjedhor, si dhe të Ligjit nr 119/2014 “Për të Drejtën e Informimit ” neni 2 shkronja c, neni 3 dhe neni 11.

Me dëshirën për të kontribuar në krijimin e kulturës demokratike të transparencës, në javët apo muajt në vijim në bashkëpunim më një nga studiot më të mira në trajtim e çështjeve për të drejtë publike dhe ekspertizë në legjislacionin elektoral, do ti drejtohemi institucioneve përfshi edhe të gjyqësorit me qëllim interpretim dhe rregullim doktrinar, të të Drejtës së Informimit mbi Financimin Elektoral. Megjithëse fushata ka përfunduar, dhe ndërkohë raportet e auditimit të subjekteve elektorale mund të publikohen, ne shohim me vend një interpretim doktrinar të çështjes nëse janë partitë politike subjekte të të drejtës për informim publik, sikurse a duhet ato të bëjnë publike në kohë reale të dhënat mbi donatorët dhe shpenzimet në fushatë.

Duke vlerësuar rolin e medias tradicionale në trajtimin e çështjeve që kanë të bëjnë me transparencën dhe zhvillimet elektorale, ju ftoj të ndiqni ecurinë e kësaj ankese / çështje të iniciuar. Për informacion të mëtejshëm ju lutem mos hezitoni të na kontaktoni.

Bashkëlidhur Kopje e Ankesës për Komisionerin për të Drejtën e Informimit dhe Mbrojtjen e të Dhënave Personale

Kërkesa për Subjektet Politike.

Kërkese për informim PD

Kërkese për Informim LSI

Ankesë për komisionerin për të Drejtën e Informimit

Kërkesë për Informim PS

Broshura e rrjetit Unite-IT në gjuhën Shqipe

/in , /by

Unite-IT  është rrjet joformal i përfshirjes dixhitale të profesionistëve (mësuesit dhe trajnerët, ekspertët, mjekët, biznesi, hartuesit e politikave, akademikë) që synojnë bashkimin e Evropës përmes Fuqizimit dixhital. Unite-IT  krijon një hapësirë bashkëpunimi për anëtarët e saj që të angazhohen në mënyrë të hapur dialogu, ndajnë  përvoja dhe burime ndërtojnë kontakte mes njëri-tjetrin dhe të krijojnë partneritete.

Kjo do të rrisë kapacitetet e tyre dhe ngritjen e vetëdijes në mesin e shoqërisë në lidhje me potencialet parealizuara të kompetencave dixhitale për përfshirje ekonomike dhe sociale.

Broshurën  me informacion më të detajuar për Unite-IT e gjeni si më poshtë:

UniteIT_2_brochure_ALB

Raport Përfundimtar i ZA’LART 2015

/in /by

Në platformën ZA’LART me slloganin Bëji Zgjedhjet të Vlejnë, në periudhën 22 maj – 26 qershor 2015 kanë mbërritur 411 raportime qytetare të cilat përmbajnë informacion dhe denoncime për abuzime në kuadër të fushatës zgjedhore, gjatë dhe pas ditës së zgjedhjeve vendore të 21 Qershorit. Në raportimet e ndara në 12 kategori numri kryesor i raportimeve ka të bëjë me raste të Keqpërdorimit të Administratës dhe Sektorit Publik. Shkelje të cilat kanë patur një sensibilitet të lartë që përkon me 29 % të rasteve të raportuara apo 121.

Janë konstatuar raste të përdorimit të sektorit publik si: prezenca e udhëruar e punonjësve të administratës në mitingje elektorale, kërkesa për të deklaruar dhe premtuar votën kundrejt mundësive për të mbrojtur vendin e punës. Raste tipike të largimit të bluzave të bardha nga spitalet dhe qëndrat shëndetësore për pjesëmarrje në takime elektorale në orarin zyrtar të punës janë shënuar në: Librazhd, Fushë Arrëz, Mirditë dhe Berat, presione ka patur dhe në bashki si: Vorë, Kamëz dhe Kukës.

 Tensione dhe Parregullsi Zgjedhore kanë zënë 53 të raste ose 11% të raportimeve qytetare. Problematikë tjetër e hasur në këto zgjedhje është Tentativa për Blerje Vote kundrejt parave, shërbimeve apo përfitimeve abuzive të cilat janë raportuar 5 herë më shumë se në zgjedhjet e vitit 2013.Tentativa për ta manipuluar votën e 18 vjeçarëve duke tentuar te rekrutohen ata në shkolla publike është një detaj që është raportuar në këtë fushatë në qytetet si Vora, Rrësheni, Kukësi, Kamza dhe Lezha etj.

Në këto zgjedhje është raportuar edhe një përqëndrim i madh i forcave të policisë në zonat më problematike në 13 raste, si në: Koplik, Krujë dhe Lezhë. Denoncime në ZA’LART janë identifikuar dhe për kategori si: Parregullsi në Listat e Zgjedhore 16 raportime apo Cënim i të Drejtës së Votës në 21 raste.

Në periudhën para zgjedhore raportimet më të shumta kanë ardhur nga Bashki si ajo e Fierit dhe e Kamzës me nga 17 raportime secila, si dhe nga Kukësi me 16 raportime. Ndërsa në datën e zgjedhjeve zona e cila ka patur më shumë raportime ka qënë Shkodra me 29.3% e pasuar nga Fieri në 8.2% dhe Gramshi 7.1%.

Raportet janë verifikuar dhe vërtetuar në 52% të rasteve nga redaksia Ad-Hoc e ZA’LART e përbërë nga gazetarë lokalë dhe ekspertë në monitorimin e vlerësimin e zgjedhjeve. Këto raportime janë shoqëruar dhe me fakte audiovizuale, 20 (video) dhe 257( foto).

Ditën e zgjedhjeve 21 Qershor janë shënuar gjithsej 90 raportime për kategori si: Tensione dhe Parregullsi Zgjedhore (25% të raportimeve) dhe Parregullsi në Funksionimin e Institucioneve Zgjedhore 17%.

Në ditët post-zgjedhore nga 24 raportime në total, 11 raportime lidhen me problematika të ndyshme dhe tensione zgjedhore, si dhe 9 raportime me mos-funksionimin e institucione zgjedhore. Platforma ZA’LART gjatë fushatës dhe zgjedhjeve të 21 qershorit ka patur impakt të gjerë në opinionin publik lidhur me problematikat dhe risitë e hasura në këtë proçes zgjedhor duke forcuar partneritetin media-shoqëri civile.

 

____________________________________________________

Të dhëna të portalit dhe rrjeteve sociale të Za’Lart janë: 

➤ WEB: http://zalart.al

➤ FB: ZA’LART – Raised Voice Albania (community)

➤ Twitter – ZA’LART @ZaLartAlbanian

➤ YouTube – ZA’LART 2015

https://www.youtube.com/watch?v=_XpjHdSa0xE

AIS në Edicionin e 3-të të Shkollës Verore Ndërkombëtare për Qeverisje të Hapur dhe Bashkëpunim, 2015

/in , /by

Instituti Shqiptar i Shkencave edhe këtë vit do të jetë pjësë e edicionit të 3-të të Shkollës Verore Ndërkombëtare me fokus Teknologjitë dhe aplikacionet për Qeverisje të Hapur dhe Bashkëpunim, organizuar nga Departamenti i Informacionit dhe Sistemeve Inxhinierike të Universitetit të Egjeut në Samos/Greqi në datat 29 qershor – 3 korrik 2015.

Në këtë aktivitet AIS / Open Data Albania do të përfaqësohet nga Shefiko Hajna, analiste për Open Data dhe Marilda Mancka pjesë e grupit të punës për Open Data Albania.

Shkolla Verore OpenGov2015 do të mundësojë përfshirjen e pjesëmarrësve në “Qeverisje të Hapur dhe Bashkëpunim” nëpërmjet çështjeve të tilla si: të dhëna të hapura, crowd-sourcing, modelim analitik dhe simulimi i mjete të sakta, analizë të dhënash dhe teknologjive vizualizuese.5668494685e1efd38006275d42719e28

Deklaratë e përbashkët e anëtarëve të Dhomës Zgjedhore mbi administrimin e proçesit zgjedhor

/in , /by

Dhoma Zgjedhore përmes anëtarëve të saj si KZLN dhe ISP ka monitoruar proçesin zgjedhor dhe tani do të vazhdojë të monitorojë proçesin e numërimit të votave. Përmes portalit online zalart.al është bashkëpunuar me qytetarët për të siguruar një proçes të rregullt zgjedhor.

Fakti që qindra qytetarë në të gjithë Shqipërinë i janë përgjigjur thirrjes për të raportuar në portalin zalart.al duke denoncuar çdo shkelje të evidentuar, përbën një lajm të mirë dhe tregon një angazhim për zgjedhje të lira dhe të ndershme.

Proçesi votimit në përgjithësi u zhvillua në kushtet e një situate normale të rendit dhe sigurisë. Sjellja e policisë së shtetit vlerësohet të ketë qenë në përputhje me ligjin zgjedhor.

Gjithashtu vlerësojmë se media po luan një rol tepër të rëndësishëm në pasqyrimin minutë pas minute të situatës zgjedhore në mbarë vendin.

Daljet publike të partive politike në ditën e votimit megjithëse të kufizuara krahasuar me zgjedhjet e shkuara kanë thyer heshtjen zgjedhore. Gjithashtu në kundërshtim me ligjin u vëzhguan pranë qendrave të votimit dhe mjediset rreth tyre të kandidatëve, deputetëve dhe përfaqësuesve të tjerë politikë. Gjatë ditës së sotme është konstatuar se komisionet e Qendrave të Votimit nuk kanë marrë masa për zbatimin e kërkesave të ligjit, që në 150 m larg QV të mos ketë materiale propagandistike. Raste të tilla janë raportuar në disa qytete.

Për shkak të ndarjes me vonesë të bazës materiale dhe mungesës së komisionerëve hapja e proçesit të votimit të bëhet me vonesë në disa QV apo për hapjen e tyre pa praninë e të gjithë anëtarëve.

Gjithashtu u konstatua se personave me aftësi të kufizuar nuk i janë krijuar kushtet e nevojshme të parashikuara në ligj për ushtrimin lirisht të së drejtës së votës.

Në disa raste, niveli i pamjaftueshëm i përgatitjes profesionale të komisionerëve të qendrave të votimit, ka bërë që disa votues të mund të fotografojnë votën e tyre në fletën e votimit dhe ta postojnë këtë nëpër rrjetet sociale. Një sjellje e tillë krijon kushte për shitblerjen e votës dhe deformimin e vullnetit të zgjedhësve.

Në disa raste në QV të Durrësit, Kavajës dhe Vorës u tentua që disa zgjedhës të mos lejoheshin të votojnë megjithëse e kishin emrin në listë.

Në këtë moment vullneti i votuesve shqiptar është shprehur me qetësi në kutitë e votimit. Anëtarët e Dhomës Zgjedhore bëjnë apel që çdo votë e Shqiptarëve të numërohet me korrektësi dhe zëri i tyre të dëgjohet nga palët në proces.

Anëtarët themelues të Dhomës Zgjedhore:

Bëjnë thirrje për një mirë-administrim të fletëve të votimit dhe materialeve zgjedhore.

Bëjnë thirrje forcave politike që të tregojnë vullnetin e tyre në mënyrë që komisionerët e tyre të zbatojnë ligjin zgjedhor për numërimin, vlerësimin dhe tabelimin e rezultateve zgjedhore

I bëjnë thirrje administratës zgjedhore dhe në veçanti grupeve të numërimit të zbatojnë me përpikmëri kërkesat e ligjit.

Ripërsërisin qëndrimin e tyre që për çdo rast të konstatuar të thyerjes së ligjit të fillojë hetimi kryesisht nga organet ligjzbatuese.

Dhoma Zgjedhore, përmes KZLN do të monitorojnë hap pas hapi proçesin e numërimit të votive në të 90 qendrat e numërimit.